1Cor 11 | NdeIBE | STEP | Landelani isibonelo sami, njengalokhu lami ngilandela isibonelo sikaKhristu.

1 Corinthians 11

1 Landelani isibonelo sami, njengalokhu lami ngilandela isibonelo sikaKhristu.

Imfanelo Ekukhonzeni

2 Ngiyalibonga ngokungikhumbula ezintweni zonke langokubambelela ezimfundisweni, njengokuzethula kwami kini.

3 Kodwa ngifuna ukuba likwazi ukuthi inhloko yamadoda wonke nguKhristu, lenhloko yowesifazana yindoda, lenhloko kaKhristu nguNkulunkulu.

4 Yonke indoda ekhuleka loba iphrofithe ikhanda layo limboziwe ihlaza ikhanda layo.

5 Lowesifazana wonke okhuleka loba aphrofithe ikhanda lakhe lingambozwanga uhlaza ikhanda lakhe – kufana lokuthi ikhanda lakhe liphuciwe. 6 Uma owesifazana engambozi ikhanda, kumele agele izinwele zakhe; njalo uma kulihlazo kowesifazana ukugela loba ukuphuca izinwele zakhe, kumele alimboze ikhanda lakhe. 7 Indoda akumelanga imboze ikhanda layo, ngoba iyisifanekiso lodumo lukaNkulunkulu, kodwa owesifazana uludumo lwendoda. 8 Ngoba indoda kayivelanga kowesifazana, kodwa owesifazana wavela endodeni, 9 njalo indoda kayidalelwanga owesifazana, kodwa owesifazana wadalelwa indoda.

10 Ngakho-ke, njalo ngenxa yezingilosi, owesifazana kumele abe lophawu lwamandla ekhanda lakhe.

11 Kodwa eNkosini, owesifazana weyeme endodeni, lendoda yeyeme kowesifazana.

12 Ngoba njengoba owesifazana wavela endodeni, ngokunjalo indoda layo izalwa ngowesifazana. Kodwa izinto zonke zivela kuNkulunkulu. 13 Ahlulelani lina ngokwenu: Kulungile yini ukuba owesifazana akhuleke kuNkulunkulu ikhanda lakhe lingambozwanga na?

14 Imvelo yezinto uqobo kayilifundisi yini ukuba uma owesilisa elezinwele ezinde, kulihlazo kuye, 15 kodwa owesifazana nxa elezinwele ezinde, kuludumo lwakhe? Ngoba waphiwa izinwele ezinde njengesimbozo. 16 Uma umuntu efuna ukuba lenkani ngalokho, kasilawo omunye umkhuba – lamabandla kaNkulunkulu kawalawo.

Isidlo SeNkosi

17 Kuziqondiso ezilandelayo angilincomi, ngoba imihlangano yenu yenza ububi obunengi kulobuhle.

18 Okokuqala, ngizwa kuthiwa nxa libuthene njengebandla, kulokwahlukana phakathi kwenu, njalo ngiphosa ngikholwe.

19 Akuthandabuzeki ukuthi kufanele kube lokungavumelani phakathi kwenu ukuba kubonakale ukuthi yibaphi abenu abamukelwe nguNkulunkulu. 20 Lapho libuthene, akusiSidlo seNkosi elisidlayo, 21 ngoba ekudleni kwenu, lowo lalowo wenu uyaqhubeka engamelelanga omunye. Omunye usala elambile, omunye adakwe. 22 Kanti kalilamakhaya yini okudlela lokunathela kuwo? Kumbe liyaleyisa yini ibandla likaNkulunkulu lidumaza lalabo abangelalutho na? Ngizakuthini kini na? Ngingalincoma ngenxa yalokhu na? Impela hayi!

23 Ngoba eNkosini ngamukela lokho lami engakudlulisela kini. Ukuthi: INkosi uJesu, ngalobobusuku eyanikelwa ngabo, yathatha isinkwa,

24 kwathi isibongile, yasihlephuna yathi, “Lokhu kungumzimba wami, ongowenu; yenzani lokhu ukuba lingikhumbule.”

25 Ngokufanayo, emva kokudla yathatha inkomitsho, yathi, “Inkomitsho le iyisivumelwano esitsha egazini lami; yenzani lokhu izikhathi zonke lapho liyinatha, lingikhumbule.” 26 Ngoba lapho lisidla isinkwa lesi linatha lenkomitshi le, litshumayela ukufa kweNkosi ize ibuye.

27 Ngakho-ke, lowo odla isinkwa loba anathe inkomitsho yenkosi ngokungafanelanga uzakuba lecala lokwenza isono ngomzimba langegazi leNkosi. 28 Umuntu kumele azihlole phambi kokuba adle isinkwa loba anathe inkomitsho. 29 Ngoba lowo odlayo anathe engawukholwa umzimba weNkosi udla anathe ukwahlulelwa kwakhe. 30 Yikho nje abanengi phakathi kwenu bebuthakathaka begula, njalo lenengana lenu selifile. 31 Kodwa uma sizahlulela kasiyikwahlulelwa. 32 Lapho sisahlulelwa yiNkosi, siyajeziswa ukuze singalahlwa lomhlaba.

33 Ngakho-ke, bazalwane bami, uma libuthene ukuba lidle, kalibomelelana.

34 Uma omunye elambile, kabokudla ekhaya, ukuze kuthi lapho selibuthene kungabi lokwahlulelwa. Ekufikeni kwami ngizalipha ezinye iziqondiso.